Hövzə Xəbər Agentliyinin verdiyi məlumata görə ölkə üzrə elmi hövzələrin rektoru Ayətullah Əlirza Ərafi Elmi Hövzə və Ruhanilik Muzeyi və Sənədlər Mərkəzinə baxışı zamanı Hövzə Xəbər Agentliyinin müxbiri ilə söhbətində ümumi müraciətlə çıxış edərək vurğulayıb: Mən Hövzə Xəbər Agentliyi vasitəsilə hörmətli mərcəi-təqlidlərə, tanınmış alimlərə və müxtəlif nüfuzlu şəxsiyyətlərə müraciət edirəm. Onların ixtiyarında elmi hövzə və ruhanilik, yaxud Qum şəhəri, İmam Xomeyninin (r) hərəkatı və İslam İnqilabının müxtəlif mərhələləri ilə bağlı sənədlər varsa, həmin sənədlərin əsllərini və ya surətlərini Hövzə və Ruhanilik Muzeyinə və Sənədlər Mərkəzinə təqdim etsinlər. Bu, bizim ümumi müraciətimizdir.
Elmi Hövzələrin rektoru Ayətullah Ərafi vurğulayıb: Hövzə Xəbər Agentliyi bu mövzuda özü təbliğat işi aparmalı, sənədlər toplusunun zənginləşdirilməsi məqsədilə alimləri, tanınmış şəxsiyyətləri və geniş ictimaiyyəti səfərbər etmək, onların dəstəyini cəlb etmək üçün müvafiq çağırış təşəbbüsü ilə çıxış etməlidir.
2 milyon nadir sənəddən ibarət möhtəşəm xəzinə
Qəyyumlar Şurasının üzvü Ayətullah Ərafi toplanmış materialların həcminə toxunaraq bildirib: Allaha şükürlər olsun ki, dostlarımızın göstərdiyi səylər nəticəsində hazırda təxminən 2 milyon sənədin toplandığı bildirilir. Bu 2 milyon sənəd öz əzəmətinə görə heç bir qiymətlə ölçülə və dəyərləndirilə bilməz. Ümid edirik ki, bu iş və bu istiqamətdəki fəaliyyət mütləq davam etdiriləcək.
Sənədlər Muzeyi tələbələrin kimliyini əks etdirən canlı güzgüdür
Ayətullah Ərafi Hövzə və Ruhanilik Sənədlər Mərkəzinin fəaliyyət istiqamətlərini və əhəmiyyətini izah edərək deyib: Bura həm Elmi Hövzə mədəniyyətinin, həm də ölkə mədəniyyətinin inkişafına və yüksəlişinə töhfə verə biləcək hərtərəfli bir mərkəzdir. Bununla yanaşı, tədqiqat, elmi araşdırma və mütaliə üçün olduqca böyük bir mənbə hesab olunur.
Ölkə üzrə Elmi Hövzələrin rektoru Ayətullah Ərafi sözlərinə belə davam edib: Bu mərkəzin əsas funksiyası tələbələrin kimliyinin yenidən formalaşdırılmasıdır. Bu muzey tələbələr üçün kimlik formalaşdıran bir məkandır. Kimlik formalaşdıran muzey dedikdə nəzərdə tutulan budur ki, tələbə buraya gələrək keçmiş tarixi gözləri qarşısında canlanmış şəkildə seyr edir və həmin tarixi keçmişi öz varlığında yenidən dərk edərək formalaşdırır.
Hövzə və ruhaniliyin tarixini tanıtmaq üçün nur saçan məşəl
Elmi Hövzələrin Ali Şurasının üzvü bu təşəbbüsün həyata keçirilməsinə rəhbərlik edən şəxslərə təşəkkürünü bildirərək qeyd edib: Məhz bu baxış əsasında dostlarımızı təşviq etdik və onlar da bu işin həyata keçirilməsi üçün böyük əzmkarlıq göstərdilər. Ümid edirik ki, Allahın lütfü ilə bu məkan kimliyin formalaşdırılması, mədəniyyətin inkişafı və cəmiyyətin tarixi Elmi Hövzə və ruhanilik institutu haqqında məlumatlılığının artırılması istiqamətində nur saçan bir məşələ çevriləcək.
Ayətullah Ərafi əlavə edib: Ümid edirik ki, alimlərin, ziyalıların və geniş ictimaiyyətin bu çağırışa müsbət cavab verməsi nəticəsində bu milli xəzinənin daha da zənginləşməsinin şahidi olacağıq. Hövzənin yazılı və şifahi irsinin qorunması ölkənin əsil İslam və inqilab mədəniyyətinin yaşadılması yolunda atılan mühüm və möhkəm addımdır. Bu davamlı təşəbbüs tarixi sənədlərin dəqiq məlumatları əsasında Hövzənin gələcəyinə dair perspektivlərin daha dolğun və aydın şəkildə müəyyənləşdirilməsinə imkan verəcək.
Xəbərin sonu
Rəyiniz